Sumibol sa tuhod ng bundok Dulang Dulang tapat ng bundok Kalatungan, ang magkaibigang sina Raul Bendit at Chong Tecson. Kilala bilang mga Talaandig ng Bukidnon, nagkamalay at lumaki sila sa gitna ng malalagong gubat, malalaking mga bato, kweba at talon, sa piling ng mga hayop at halaman, tulad ng lahat ng kanilang mga ninuno mula noong unang-unang panahon.

Sinasalamin ng mga likha nina Raul at Chong ang kanilang pamumuhay, hindi lamang sa materyales kundi maging sa pagbuo ng mga imahen at paglalapat ng mga kuwento sa bawat representasyon. Mararamdaman sa tekstura at hagod ng kanilang mga obra ang dalawang nagtutunggaling pakiramdam – ang una, ang tuwa at ligaya na ang buhay ay sagana at payak sa kanayunan; pangalawa, na nasa panganib ang pamumuhay na ito dahil sa paninira ng kalikasan ng mga dayong korporasyon at plantasyon.

-Janine Dimaranan